جیف ؤ جوروف

بعضی گیلکی واجه ئانی که اوشان ˇمئن «ف» دره، اوشان ˇ مؤسؤنچی ئن' فارسی دل
«ب» همرا شئه دئن. شاید بعضی ئن خو ور هاویرن که گیلکی زوانی گویشوران ئی
کلمه ئان' اشتبا تلفظ کونن اما گیلکی گویشان ؤ دئباخی زوانان ˇشواهد اجی شئه
فهمسئن که ئی کلمه ئان گیلکی مئن اصالت دأرن ؤ فارسی اشتبا بؤبؤر نیئن.
چندته ئی واجه کان' مؤنه ره هوریم:
1- جیف jif / فارسی مئن «جیب» این معادل هیسه، کوردی مئن
«گیفان gifan» گؤن که امی گبی حرف «ف» همرا ئی کلمه مئن نئه.
جومله مئن: دس' دنن تی جیف دل سرده.
2- جوروف juruf / فارسی مئن «جوراب» معادل هیسه، نطنزی
مئن «جؤروو joruv» ، کوردی مئن «گؤروه gorwa»، تالشی مئن انی
«گوافه goafa» بکار شو... ایشان مئن انی گیلکی «ف» معادل، «و ( v/w)»
ؤ «ف» دره.
جومله مئن: پیلامائار ایمرو دوتته جوروف وئؤتئه.
3- ترف tarf / فارسی مئن «تُرُب» استفاده بو.
جومله مئن: ئی ترف ِ دؤنه ' کویندر اجی بهئی بئی، ازا یته بونه نکونه
4- سورف surf - سوروف suruf / فارسی مئن «سُرب» ... پهلوی
مئن srub ثبت بؤبه اما اونی حرف نیویسی sl(w)p همرا بومئه.
جومله مئن: زر دؤجین ˇ قسمت سورفه (ضرب المثل)
5- سفه safe / فارسی مئن «سبد» ( سفه دقیقا فارسی مئن «سبد» معادل نیه؛
سفه یه جور وئؤته هیسه که سیهال یا وی دار ˇچمن خالان اجی سأجن)
جومله مئن: دئوختان مال ˇ سر دوتته سفه نئان ؤ رودبار ˇ جی میوه هوردن.
دومبالینی واجه اجی گب' سره دیهیم؛ غربی دیلمی گویش مئن سفه جا،
«سپپه sappe» یؤ ترف ˇ جا «ترپ torp» بکار شو ولی
«جیف، جوروف ؤ سورف»، «ف» همرا ایتکی درن :
«جیف jif/ جورَف juraf/ سلف self».
هئی قضیه اجی که رودبار مئن ئی کلمه ئان بعضی ئن «ف» همرا درن
ؤ بعضی ئن «پ» همرا، شئه فهمسن که گیلکی مئن اولیه صورت «پ»
همرا بؤ که بعضی گویشان ˇ مئن بؤمؤنسئه، خورتاوی تبری دل انی هم
«ف» دره هم «پ» بعضی ئن انی «ب» بؤبؤن ( جیف jif / سلپ selp ) ..
هوته که اشاره بؤبؤ «سورف» ˇ ره پهلوی حرف نیویسی انی «پ» ' نشان
دهه (دئباخی کلمه ئان' دئباری زوانان ˇ مئن نیاتم) قیاس اجی تالشی ؤ
کوردی یؤ نطنزی مئنی «ف-و» انی شئه هئی دئباری «پ» اجی دؤنسن.